Quinto Piermaria

 

A i ho cnosciud e frequentèd ma Quinto Piermaria in ocasion d'la fondazion e durant la corta atività del Centre Culturèl "O. Giansanti" mo tutt e dò a ce cnoscémmi già da tèmp anca se solamènt de vista: ma me el me piaceva come poeta dialetèl, com autor d'le edizion de "Pesaro in tasca", e de vari artìcol sora la vechia Pésre, lò, a créd ch'el fussa vnud a véda d'le mi' rappresentazion mo el me cnuscéva anca come fiol de Duilio (i era tutt e do bsarés d.o.c.g.). A ce sim anca incuntrèd più volt sora el palchscenich in ocasion de serèd de poesia organizèd dal Centre Culturèl. A l'arcòrd com un òm bòn, giovièl e argut e fra d'nojatre c'è stèd subit un rapòrt de simpatia reciproca. A créd ch'j facéssa piacér el fatt che me, de tanti ann più giovne de lo, a cultivassa el dialètt bsarés. A téngh ancora da cont la poesia ch'l'ha scritt ma me e ma mi' moj in ocasion del nostre matrimòni, i c'l'ha regalèda insièm sa un fior incolèd sora. Quand l'è scompars a i ho dedichèd sti versi maché:

AD UN POETA

Un poeta, dop d'un po',

par pudé méj contemplè

e abracè la su cità

sempre ameda

sempre t'nuda

te'l su còr,

i la vo' veda da l'alt

par pudé descrivla méj.

E' acsé che Piermaria

l'è gid só più in alt che s'pó,

tra le nuvol,

tra le stell,

par pudé cantèla ancora

sa i su vèrs péni d'amór,

par pudé par sempre dilli:

Pésre mia

a t'tengh te'l còr.