Gioacchino Rossini

A sim propi furtunèd
d’avé avud in t’el pasèd
un glorios concitadén
cum Rossini Giuvachén!
Un compositor artista,
anzi: un gèni musicista!

Anca s’l’era un po’ indolènt
l’era un òm d’temperamènt,
rafinèd e fantasios,
istintiv e malizios
e quand pò el s’metéva a scriva
la su musiga la giva
alta, libra ed imponènt
deliziand ma tanta gènt,
cum un còr ch’d’amor s’acénd
so so in alt cum un “crescénd”!

Te pudéssa scriva ancora
de cla musiga ch’l’arcora
e pó fèla piòva gió
dolcement tramezz ma no…
sora Pésre la nirìa
cum na granda sinfonia!

E chissà se indó t’zi adèss
fors par chèsi t’è sucèss
da sentì qualca canzon
de chel nostre Pasqualon!
Sarìa bèll a fè un qualcò
méss insièm da tutti e do!
J angiulèn sa i cherubini
sa la musica d’Rossini
e sa i versi de Giansanti…
farìa festa tutti quanti!

Paolo Cappelloni