sarà fors l'età ch'avanza
o ch'a so un po' nevrastenigh,
mo en capisc ste fatt d'le dmenigh
che in t'el centre an poss entrè
sa la mèchina e guidè
parchè i dic ch'l'inquinament
l'è aumentèd bondantement
e s'a vagh in centre a tògh
solamènt un sacch de smog,
o se bèn a vléssa dil
s'parlarìa d'polvre sotìl.
Anca se en da propi gust
el proposit l'è anca giust
mo en capisc: Par tutt la stmèna
en c'è un fil de aria sèna
parchè i scarigh d'i motor
i t'arnéga a tutt le or,
pó quand'è bèn intasèd
ch'an vèn só pió manca el fièd
a la dmeniga è tutt pén
de faméj: om, donn, fiulén,
tutti a pid o in bicicletta
ch'i paseggia senza fretta
par el centre a respirè
tutt el gas armast malé!
Sarà d'moda da fè acsé…
Dai, che in t'l'aria è pén d'carbon,
respirém a pén palmon!
Ma co' serve cl'èria féna
ch's'respirèva par maréna
tra el salmastre e un po' d'salvatigh?
En è méj ch'i tub de scarigh?
Sere fa sa un'amigh mia
dop d'na cena a sim gid via,
a j avém chiapèd el vièl
arivand a la Statèl
e lo el stèva respirand
cum quand un el sta fumand
me aj digh: "Co' t'fa, t'sta mèl?"
"No, a m'fum…. na Nazionèl!!"
Paolo Cappelloni
