Sémbra strèn mo a m’l'arcòrd bèn:
A so' vnud a stè a Pantèn,
(e ann'i poss propi pensèi)
te'l novcènt cinquantasèi,
chl'era ancor tutt 'na magagna:
mezz cità e mezz campagna,
pén de camp, d'curdèr, d'fatór,
vacc, zanzèn e lavadór,
stagn sa i bott e raganèll,
ort sa succin e cmarèll.
Come tutti, da fiulén,
a so'gid ai Capucén
do s'è fatt, sa tutt i crisme,
la dotrina e el catechisme,
s'è preghèd e s'è giughèd
lungh la spónda del Valèd.
E la dmeniga a le dó,
par cent lir o qualco' d'pió:
rigolizia e sementine
se curiva dritti al cine
t'un chèl vècch e bel teatrén
della chis d'i Capucén.
Quéi d'la mia generazión
jà studièd a spargujón,
nè al Carducci o al Perticari
mo in locali sempre vari
e a la scòla te te giv
sora le cooperativ
de via Gai o d'via Pantèn
(prò a j avém studièd par bèn).
De via Rossi o d'via Cantór
a pudria parlè par ór,
d'via Tesei o Confalonieri
a m'arcòrd cum fussa ieri
e el ricord l'è ancora viv
de tutt quant el Camp Sportiv.
A stè punt qualch'd'un, maché,
el pò di', pensand tra sè:
de tutt quant 'sti arpensament
en me fréga propi gnènt,
mo chi tenga pur par ló,
parchè il vèn a di' ma nó?
L'ha ragión, a n'i dagh tòrt,
mo d'sigur l'è nèd al Pòrt!
D'cénd acsé de cert en sbaja,
mo d'sigur l'è de Muraja!
Quel ch'el dic enn'è bugia,
mo d'sigur l'è de Soria!
El discors el fila bèn,
mo d'sigur... en è d'Pantèn!
___________________
Paolo Cappelloni
___________________
