Favuléna: Le pillol par insuniè

C'era ‘na vòlta un signór ch’l’aveva apèrt ‘na butéga in dó el vendéva d’le pillol de sua invenzion: pillol par insuniè. Chi, par esémpi, el vléva insuniè da essa ricch bastèva ch’el toléssa la pillola gialla préma da gì a durmì e par tuta la nott l’insunièva da avé milión de milión. Chi el vléva insuniè da vulè el toléva la pillola azurra e par tuta la nott el fèva cl’insòni malé; c'era le pillol par tutt j insòni, ogni insòni ‘na pillola de un culór diferènt. La butéga la j era sempre péna de gènt e ste signór el guadagnèva un sacch de sòld (ogni pillola la custèva cinque euro) mo sa’l pasè del tèmp l’era dventèd sempre pió svojèd e quand el fèva le pillol en j metéva pió l'atenzión e la cura ch'j metéva ‘na volta. - Tant – el ragiunèva tra d’ló – la mi’ butéga la j è l'uniga ch’la vénd le pillol par insuniè e tutt i vèn da me! - Alóra co’ l’è ch’è sucèss? E’ sucèss ch’è vnud un òm a dmandè ‘na pillola par insuniè de abitè in campagna che invéc’ dòp l’ha insunièd ch’el stèva magnand un pésc. E’ vnuda ‘na signora a dmandè ‘na pillola par insuniè ‘na bela pliccia e che invéc la j ha insunièd par tuta la nòtt ch’la lavèva i piatt. Un sacch de gènt la j è gida a protestè dai carabinir che j ha arestèd ma ste signór par vendita de insòni sbajèd e i l’ha purtèd in prigión.
Adèss l’è ancora malé, in prigión, e el sta sognand la libertà senza dové magnè nisciuna pillola (e senza paghè gnènt!)

Paolo Cappelloni